English
១-ប្រវត្តិសង្ខេបរបស់វិទ្យាស្ថាន
ឆ្នាំ១៩៩៧មជ្ឈមណ្ឌល វ៉ាន់ដាគណនេយ្យ (VANDA ACCOUNTING CENTER) បានបង្កើតឡើងក្រោមរូបភាពជាផ្ទះ៣ល្វែងស្ថិតតាមបណ្តោយមហាវិថីម៉ៅសេទុង សង្កាត់ទំនប់ទឹក ខណ្ឌចំការមន រាជធានីភ្នំពេញដែលបណ្តុះបណ្តាលជាវគ្គសិក្សាខ្លីៗទៅលើមុខវិជ្ជាគណនេយ្យ និងគណនេយ្យ កុំព្យូទ័រ និងបង្រៀនដោយផ្ទាល់ដោយលោកសាស្រ្តាចារ្យ ហេង វ៉ាន់ដា។
ដោយសារតែកំណើននៃការចុះឈ្មោះចូលរៀនវគ្គខ្លីចេះកាន់តែកើនឡើងពីមួយវគ្គទៅមួយវគ្គ ហើយសិស្សមួយចំនួនធំសំណូមពរចង់រៀនគណនេយ្យបន្តដល់កម្រិតបរិញ្ញាបត្ររងនិងបរិញ្ញាបត្រជាដើម។ ដូច្នេះទើបលោកសាស្រ្តាចារ្យ ហេង វ៉ាន់ដាសម្រេចចិត្តស្នើរសុំទៅក្រសួងអប់រំ យុវជន និងកីឡា ដើម្បីបើកបណ្តុះបណ្តាលកម្រិតឧត្តម។
ឆ្នាំ២០០១ក្រសួងអប់រំ យុវជន និងកីឡាអនុញ្ញាតឲ្យបើកដំណើរការមហាវិទ្យាល័យវ៉ាន់ដាគណនេយ្យ ដើម្បីបណ្ដុះបណ្ដាលជំនាញ គណនេយ្យកម្រិតឧត្ដមសិក្សា និងនៅរក្សាមជ្ឈមណ្ឌលវ៉ាន់ដាគណនេយ្យ ឲ្យនៅក្រោមការគ្រប់គ្រងរបស់មហាវិទ្យាល័យ វ៉ាន់ដាគណនេយ្យដដែល។
ដោយហេតុតែឈ្មោះជាមហាវិទ្យាល័យមានលក្ខណៈចង្អៀតពេកដូច្នេះ លោក ហេង វ៉ាន់ដា បាន សម្រេចប្រែក្លាយពីមហាវិទ្យាល័យ វ៉ាន់ដាគណនេយ្យ ទៅជាវិទ្យាស្ថាន វ៉ាន់ដាយោងអនុក្រឹត្យលេខ ៧៨ អនក្រ ចុះថ្ងៃទី ០៩ ខែ សីហា ឆ្នាំ២០០១។
នាឆ្នាំ២០០១នេះផងដែរ វិទ្យាស្ថាន វ៉ាន់ដា បានបណ្តុះបណ្តាលកម្រិតបរិញ្ញាបត្រឋិតក្នុងទីតាំងផ្ទះ៣ល្វែងជាបណ្តោះអាសន្ន និងមាននិស្សិតត្រឹម១០០នាក់។ សំណង់អាគារទី១បានបញ្ចប់នាឆ្នាំ២០០២ ហើយ បានបញ្ជូនសិស្សពីផ្ទះ៣ល្វែងមកសិក្សាក្នុងបន្ទប់រៀនត្រឹមត្រូវតាមស្តង់ដាដោយមានចែកជាបន្ទប់សិក្សាទ្រឹស្តី បន្ទប់អនុវត្តកុំព្យូទ័របន្ទប់ស្តាប់ភាសា និងបន្ទប់គណនេយ្យអនុវត្ត។
បច្ចុប្បន្នវិទ្យាស្ថាន មានសាខាចំនួន៣ សាខាទី១មានទីតាំងនៅក្រុងភ្នំពេញ សាខាទី២មានទីតាំងនៅក្រុងសៀមរាប សាខាទី១មានទីតាំងក្រុងបាត់ដំបង។